朝日屋 (已結業)

朝日屋係公司附近一間我好鍾意嘅日式料理小店，丼飯好抵食，環境舒適，員工非常友善，所以耐唔耐會幫襯。海膽三文魚丼飯，海膽鮮甜，三文魚肥美而且份量十足，海膽下嘅玉子都好好食。跟餐嘅味噌湯咸度剛剛好。好鍾意呢度嘅茶碗蒸，入面有獅子狗同日本魚蛋，上湯濃郁，蒸蛋又滑，每次食完都心思思想學吓點整。六貫壽司定食好似平時午市冇見，可能係晚市限定。魚類同蝦、帶子都十分新鮮同厚身。今日牛肉烏冬味道濃厚，連湯都飲埋～跟餐的荔枝紅茶，飲到最底好甜。因為同桌有人第一次黎食，我地仲追加左啲野食。厚燒玉子配黑松露香氣四溢，分量十足。鍾意黑松露嘅人可以試吓。蒜香青酒煮藍青口，個湯超香超濃，係好味到可以配一碗白飯。美中不足係有生蔥... 不過呢個係個人口味問題。吉列炸蠔反卷，好有特色，食完都好滿足。芥末章魚小食，唔輸俾連鎖店嘅味道～食物整體而言相當唔錯，選擇又多。氣氛都非常適合日式料理，之後都會再支持。