湄南.河泰式船麵 (已結業)

約咗朋友係荃灣聚舊，揀咗千色匯入面嘅泰國餐廳，餐廳裝潢樸實，食物好味而且份量十足，價錢十分親民。餐牌選擇多多，而最搶眼一定係船麵。船麵有大船麵同細船麵（三碗唔同湯底）選擇，第一次食船麵嘅我比較貪心想試多幾款湯底，所以揀咗細船麵。船麵湯係米粉配豬頸肉，牛湯底鮮甜有層次，有濃郁蔥蒜香同淡淡金不換味，豬頸肉有焦香味，肉質爽彈。冬陰功湯係金邊粉配牛肉片，冬陰功湯酸辣適中，好有泰國風味。麻辣湯係配河粉鴨血，鴨血夠滑溜，而且麻辣湯都好出色，聞落好香麻味但食落麻同辣都好適中，唔會搶喉。木瓜沙律套餐加配小食或沙律只需22蚊，啱晒眼闊肚窄嘅食客。沙律唔會太辣，酸酸甜甜好開胃。海南雞撈金邊粉撈金邊粉都係第一次見，味道偏酸甜，有輕微蒜味，金邊粉濕濕哋但唔會太淋，海南雞肉質滑溜。無骨鳳爪套餐加配嘅無骨鳳爪，無骨鳳爪爽脆，酸酸辣辣好開胃。小食拼盤雞棗外皮香脆，餡料juicy彈牙。春捲粉皮香脆，餡料口感豐富，有淡淡咖喱味。炸蝦丸香口彈牙，泰式魚餅彈牙juicy,有清新檸檬葉嘅香味。