青森料理 (已搬遷) 新店位置

今天到了市中心逛街，有少許肚餓，於是想到青森一試日本料理。由於時間較早（6:00pm），所以不用等位，同男朋友兩人可即時入座（之前一次試過7點幾到門口大排長龍）。一坐下來，已決定要試一試它們的芒果蟹籽沙律及什錦壽司拼盤，另外因為驚唔夠飽，所以叫了一客青森招牌拉麵。第一樣先上的是蟹籽沙律，嘩，係用湯碗盛載的，重要勁滿的一大碗，我同男朋友都不禁當場呆了，心想食完都飽哂啦。然後再來的是壽司，同樣是件件大大舊（刺身勁大塊），因為怕壽司放得耐唔係咁好，所以沙律食了三分一就轉軚吃壽司了，剛剛食了第一件壽司，連拉麵都上桌了，拉麵有很多配料，重有一隻炸蝦，由於浸得太耐會淋哂唔好食，於是我們又放下壽司轉攻拉麵。如是者當我們再食番壽司同沙律時已半飽，壽司太大份食得太飽亦欣賞不了它的鮮味，而沙律再食時亦因出哂水而不太好吃。總括來說，食物質素唔錯，大件夾抵食，服務態度良好，我們已決定下次到市中心時再幫襯。不過下次會食完一樣再叫一樣，而且亦不會叫壽司拼盤，反而會選幾款最想吃的散叫，下次再來想試一試它的鍋物（隔離枱叫咗，好似好正）同軟殼蟹粥。真係諗起都想食！