賀記

營業中

休息中

平日星期二下午大約五點黎到，啲人返工返學，入面無其他客人，室內環境好舒服，可以一個人靜靜地睇書。嗌咗個杏仁茶燉木瓜。個賣相好靚，有食用花點綴。一黎到個杏仁茶好熱，要小小口咁食。 我本身唔特別好杏仁茶，驚有陣奇怪藥水味。不過呢個杏仁茶燉木瓜無嗰陣奇怪藥水味，店主解釋由純杏仁整出黎係會無嗰陣奇怪味。我食到一半，店主拎住個煲走過黎問我係咪唔夠喉，又倒啲熱杏仁茶落去個木瓜。佢話因為木瓜厚肉，唔夠杏仁茶，加上佢又有時間，就畀多啲我好驚喜呀！本身杏仁茶個味道已經好香，連人情味都咁好。個木瓜肉有得自己刮下刮下，同熱杏仁茶好配。食完個口腔都仲停留左好香嘅杏仁茶味，原來好食嘅杏仁茶會係咁，我對杏仁茶有啲改觀。店主好好人，得閒傾左幾句偈。室內環境舒適，賣相吸引，食物味道又好，店主又nice。帶畀我一個美好嘅體驗，今日放假咁樣渡過覺得好滿足。