成發海鮮小廚

營業中

休息中

呢間之前食過幾次, 通常都收工一個人去, 一個煲仔菜一碟炒菜一支大啤, 通常200左右落樓, 已經發覺埋單時跟餐牌價錢總有啲出入, 不過相差不遠就算啦, 咪當比加一咯。前晚如常一個人去, 大鱔煲餐牌寫時價, 所以今次已經醒目專登問了店員幾錢, 店員回覆幫我問老細, 之後回覆蒜子大鱔煲收$198, 其實我都覺得大排檔嚟講都算貴, 不過問咗價唔要又好似好衰, 咁最後叫咗一個蒜子大鱔煲, 一碟蒜蓉菜心加一支大啤。最後埋單時竟然收我$380, 我問老細點解咁貴, 佢話呢個價冇錯, 我要求睇單, 原來蒜子大鱔煲收咗$288, 菜心$60, 大啤$32, 我就問佢唔係$198咩？佢話一路都係$288, 仲話我食嘢唔知價, 我就話係嗰個店員覆價$198我先會點, 後來嗰個店員都埋嚟同老細講話係佢自己(即收我錢嗰個)覆$198, 但老細竟然反口話成晚都冇人問過佢價, 企梗唔肯減, 個店員表情都好無耐, 我最後冇同佢嘈, 掟低300問佢要唔要, 唔要就報警, 佢就跟住趕我走, 仲叫我行路睇車小心比雷劈喎！如果大家想親身體驗成發劏客經歷的話, 成發海鮮小廚絕對唔會令大家失望！推介！