焰拉麵 (已結業)

鍾意食菜，概然極黑焰拉麵有大量野菜，決定食佢。自助劃飛落單，揀咗食硬身麵、中濃度湯底、中度香味油、豬軟骨同要多蔥。等食期間，望吓店內的七彩壁畫、和風味裝修、紅色鐵凳、劃飛紙上面所用的字體，睇得出店家係花咗心思去做生意。極黑焰的真身完全唔黑，蔥同野菜的量少過預期。湯呢，黑蒜味同味噌都非常低調，可能係揀咗中濃湯同中香油有關吧，味道平平實實。枱頭搵唔到七味粉，放有生蒜粒同夾蒜器，自己動手加味，不過蒜粒太硬，用九牛二虎之力將佢夾扁咗，整唔到蒜茸，最終只係將一件扁咗的生蒜放入碗。碗麵，份量足夠飽肚，惹味豬軟骨入口即溶，如果增加到麵條的彈性就更好喇。飯腳叫的鮮焰拉麵，用咗櫻花蝦，樣靚。自家製煎餃子，饀多；炸雞軟骨，最正係個 wasabi 醬，喺呢餐的亮點。