海皇粥店 (粉嶺名都商場)

營業中

休息中

突然抽起條筋想食出前一丁。成個商場都有唔同連鎖店有丁食，最後見到海皇佢雙拼出前一丁連嘢飲只係31蚊。平是平絕，但又十五十六唔好唔好入去。在粥店食茶記野好似唔多對辦嘛。咁啱又我瞄到在廚房個阿姐，正在生拆一包出前一丁即煮，呢個畫面值千金！ 根據一個開茶餐廳嘅親戚講，所有茶記嘅即食麵都係用滾水淥過，擺曬落個膠筲箕度，有柯打就煮熱佢，都以全部都係腍patpat, 外熱內冷勁難食。 我靈機一動：海皇唔係茶記，反而會認真對待呢個面，因為佢唔係大量供應，根本唔會好似茶記咁淥定一大堆。個麵送到嚟，煎到蛋黃實晒的煎蛋，2片薄薄但睇得出煎過的火腿餐肉，加埋主角：新鮮由生煮到熟的丁麵，好有住家感覺。食一啖，麵身爽，好！但味道淡淡，可能只用了少於半包味粉，那種淡淡的味精湯，令人想起媽媽。畢竟呢個世界，只有媽媽才會在你的丁麵中剋扣味精，同埋加多幾條青菜。出左嚟做野多年，食的都是話之你死的味精湯麵.....呢碗媽媽麵，只欠兩條青菜吧。