Penthouse (已結業)

今日係銅鑼灣行完街，去左間靚靚既餐廳食晚餐。餐廳係最頂樓，一入去，餐廳美景真係無敵。環境高雅，仲可以係度飲杯野，氣氛超好。餐廳服務好好，幫你拉凳，坐低就幫你擺餐巾係大腿。叫左個12oz牛扒。牛扒黎之前有份麵包食。以為係比牛油同麵包一齊食，點知比左我最鍾意既青醬。其實麵包溝青醬先係最好味，酸酸甜甜，麵包外脆內鬆軟，個口感好好。食完個包，牛扒終於黎了，牛扒好大份，隔離仲有個烤蒜可以一齊食。一切開牛扒，牛扒既水份都出左黎，好juicy。入口個牛肉鮮味即刻出曬黎，呢個係我最鍾意既七成熟！。牛扒既香料好足，齋食牛扒唔點醬汁依然咁好味，唔會單調。個人好鍾意牛扒加埋蒜粒一齊食，烤左個蒜粒，陣好味好濃，加埋牛扒既鮮甜味，呢個配搭無敵！叫左碟薯角黎食。薯角加埋黑松露醬汁，正呀！外脆內軟既薯角，好快就比我ko曬。今餐真係超值，無論環境，服務，食物，樣樣都掂。今日真係超開心。臨走前見到原來間餐廳係米芝蓮餐廳，難怪質素同我之前食既西餐廳完全唔同。