東記粉麵家

營業中

休息中

除了新一代青年人外，不少人九龍東人都會認識官塘巴士總站隔離嘅粉麵街。G字頭嘅店舖，原先係一間百貨店，店舖裡面有好多化妝小姐，當時官塘真係好旺，用繁榮呢個詞語都好適合，店舖隔離行仔行入去就係大家所講嘅粉麵街。粉麵街成條行都係賣粉麵，由街頭行入去就係間小書店，有好多人買完書，就會行入粉麵街到食返碗麵，立即睇吓剛買嘅書。粉麵街除咗做街坊生意之外，仲有不少由官塘工業區過去食嘢嘅食客㗎~而小編呢就最喜歡去粉麵街入面一頭一尾嘅粉麵店喇~ 其實唔講大家都未必知，其實頭尾兩間店嘅老闆係兩兄弟嚟㗎~ 自從粉麵街拆咗，有不少都結業冇再做落去，而呢間東記就係粉麵街中，喺書店旁邊嘅粉麵店，街尾嗰間粉麵店，就開咗喺瑞和街街市附近。其實東記喺搬遷之後，小編喺好多年都搵唔返，就喺今年新年時，終於俾小編去搵得返，仲得悉街尾麵店搬遷後位置㖭~店內嘅實心木凳，天花嘅吊扇，加埋支裝汽水，真係好懷念啊… 小編叫咗喜愛嘅牛筋牛肚米，牛腩汁嘅湯底加上蔥花，味道更加香同好味。牛筋夠淋而不散欄，牛肚好入味，米粉煮得軟硬恰當，整體都好好。