妹記大排檔 (已搬遷) 新店位置

生日飯，輾轉嚟咗妹記，本應想請朋友去食麵屋一平安，因為老友係哈日族，但等咗好耐好耐都仲未有聲氣，唯有轉戰妹記！雖然都好熱鬧，但同細細個晌屋村嘅大排檔氣氛有D唔同，少咗露天又開揚嘅感覺，同埋依度實在排得太多枱，密質質咁，嘈得哩好立體聲！好彩，價錢仍有大排檔嘅大眾化，食物味道都OK！三個人叫咗三個餸：海鮮雜菜煲、鬼馬油炸鬼、黑椒京蔥羊鞍煲。海鮮雜菜煲：有蝦有魷魚有帶子，味道一般，稍為淡口咗D，但叫做大堆頭，都抵食嘅！鬼馬油炸鬼：外層粉漿脆，但太厚，而且做得好「求其」！黑椒京蔥羊鞍煲：黑椒惹味，京蔥夠香，羊鞍焾滑，加埋就係個正字，全晚至有大排檔水準嘅小炒！