上海弄堂菜肉餛飩 (已結業)

年三十想食上海菜應節，決定行遠少少黎到想食好耐既上海弄堂，估唔到唔洗等位即入。菜肉餛飩 ($48) 8隻餛飩塞滿爽脆、厚而嫩既小棠菜粒，肉比例少，但鮮味十足，金元寶式摺法亦食到薄餛飩皮既煙韌。 灑滿蔥花既豉油湯底溫和唔會膩，充滿家常味道。醉雞擔擔麵 ($75)花雕酒味濃郁，餘味有少少酒糟既微苦；雞皮下呈啫喱狀，可惜分到胸位，啖啖肉但雞脾肯定更加滿足。 小辣擔擔麵濃稠度有如攤凍既花膠湯，我鐘意花生味唔會過重，肉燥、蔥粒同香辣湯汁漿住軟滑既幼麵條，必試。排骨湯麵 ($59)排骨大塊厚肉、嫩滑入味，炸漿偏粉狀薄身，唔算十分酥脆，勝在乾爽同排骨本身夠好味。 朋友唔食得辣叫左湯麵，清澈既雞湯清爽鮮甜，但份量較少，單點一份未必夠飽。年三十只可以散叫，平日其實有$86 set包左醉雞擔擔麵同4隻餛飩，今次相同組合比平時貴左少少，但份量好足好飽。 我鐘意套餐配搭好自由，可選餛飩、醉雞、排骨、無錫排骨、獅子頭等，配湯麵、菜飯或擔擔麵(+$10)，茶芥$3，環境幾靚，上海癮起時可算經濟實惠之選。 下次再戰~