新蒸武門 (已結業)

觀塘真係一個又愛又恨嘅地方，餐廳多，人又係多，為咗食好嘢多人嘅地方都要去試下。今日就揀咗呢度試下中式午餐，餐廳設計簡單，座位尚算寬闊，唔太迫。睇睇餐牌，就算係午餐都幾多選擇，價錢亦唔貴。因呢排食得太多肉類，所以清清地叫咗個精選午餐～什菌肉碎浸時蔬菜吸收了上湯，味道清甜帶鮮味 ，菌類亦新鮮，加上豬肉碎，送飯一流。午餐可加錢轉為燉湯，今日係猴頭菇栗子燉雞，無味精，猴頭菇大大粒，湯好足料，呢個湯有益、營養價值高，飲落非常鮮美。另外朋友叫咗個泰式豬頸肉湯米配老火湯，豬頸肉咬下去肉質嫩滑香口又惹味，而今日嘅老火湯係霸王花甘筍豬骨湯，味道清甜，簡單又美味，好有住家味道。