名人私房菜 (已搬遷) 新店位置

好少接觸私房菜，今次朋友book咗呢一間，話好多人都介紹。上到去有啲似住家嘅形式feel，分別有三間房同埋廳，每一台都有獨立嘅空間。事前餐廳已經同朋友安排好菜式同價錢，所以上到黎等食就可以。好似屋企食飯咁，每人都有一碗大白菜豬肺蘿蔔湯，一飲落去就知老火湯，火候十足，味道清甜。前菜係涼拌手撕雞用上芒果、雞肉、粉皮、青瓜配埋醬料撈起，感覺清新。粉皮爽韌，好開胃！啱哂夏天食！荷葉鮮蝦蒸飯蒜香滿瀉，蝦嘅數量好多，佈滿飯面，令每粒飯都吸收左鮮蝦嘅鮮味。鮑汁花膠扣鵝掌花膠同花菇都好厚肉，膠質重，索左鮑汁嘅鮮味，生菜亦新鮮，但小妹唔食鵝掌。炸蟹鉗炸蟹鉗拳頭咁大，炸得金黃，外脆肉軟，但略嫌蟹肉唔夠。蝦干肉碎炒通菜蝦乾味道鹹香，通菜新鮮爽脆，送飯一流！金銀蒜粉絲蒸扇貝扇貝圓大厚肉，好鮮味，豉油味偏甜，撈埋啲粉絲蒜蓉，加上吸收左扇貝嘅鮮味，好好食。甜品係芒果布甸鯉魚外型生猛，滑滑嘅布甸唔太甜，中間有少少芒果肉，令餐飯畫上圓滿嘅句號。