聚豪軒

營業中

休息中

諗唔到去邊度飲茶，屋企人話呢度開咗間新酒樓。入咗座之後先見到原來同屋企附近一間酒樓係同一集團，早知就唔使嚟咁遠。話雖如此，但係睇佢下午茶張紙有幾多唔同嘅特色嘢，咁就揀咗幾樣嚟試吓。紫薯鹹水角，食唔到紫薯味，但係都幾多餡又熱辣辣。個印度脆香沙律球，出邊脆卜卜幾得意，但係沙律裏便就剩係得生果就單調咗少少。個上湯蝦餃大大粒啲蝦肉都幾爽，不過個湯就冇乜味。另外個錦鹵雲吞裏便大大隻蝦肉，確係滿足嘅。不過如果有啲懷舊款式嘅錦鹵雲吞就好，即係啲醬裏面仲有其他材料，不過而家啲酒樓真係好少有。杏汁鮮竹卷，杏仁味唔算好出，對於唔好杏仁糊嘅我還係可以接受。香蕉包都幾特別，裏便疑似係香蕉蓉食落去口感幾淋滑。爽肚都好難得佢整得夠入味，出邊好多酒樓都係醬還醬，肚歸肚。個燒肉瀨粉啲燒肉下午茶嚟講，都夠脆身係值得一讚。不過個乾炒牛河就淡口少少冇乜鑊氣。最有驚喜反而係個陳皮紅豆糕，真係有陳皮味，唔太甜好似食咗碗紅豆沙落肚咁。不過就唔係好鍾意佢啲枱坐得好逼夾，一個枱號都分A B枱。