Le Bon Pain Bakery (已結業)

同老公路經此店,見佢所買嘅產品幾好樣,咪走入去買嚟試囉.今次買咗兩款麵包同各款曲奇,食過後,覺得麵包味道一般,反而曲奇幾好,價錢實惠,100g就$17,買咗十幾款都係十幾蚊,價錢真係好抵,加上味道又唔差,路過此店記住買嚟試吓.講回味道方面,詳細介紹如下:香芋合桃包,包身唔夠鬆化脆口,質感有啲韌,香芋餡味道太甜,難以入口.合桃忌廉芝士鬆餅,做得唔夠鬆軟,有啲嚡口,面頭太多糖霜,整體味道實在太甜,唔係太好食.曲奇方面,試咗十幾款,味道大致上ok,質感鬆化又脆口,加上款式算多,價錢平,真係幾抵食,如果甜度減番少少就非常好了.