勁回味

營業中

休息中

琴晚本身食左野，但覺得唔係好夠飽，所以番屋企前都順路食勁回味。勁回味大名都聽過好幾次，上次黎到又食左隔離新野。鋪面唔大，但手卷款式唔少，擺到明話你知係行平價路線~心大心細一輪。三文魚腩手卷 $20見到佢圖片影到有四片三文魚腩，本來睇死佢唔會俾足，點知實物符合圖片，真係見到有四片！賣相非常一般，可能價錢平，只能用張廚房紙包住條手卷，加上成條手卷卷冇鍊到好實，所以危危芙，就散就散咁。即係類似屋企包嘅手卷。三文魚腩有四片，雖然比較薄身，不過起碼冇取巧，加左幾條青瓜。食落肥美稱唔上，不過應該切得比較長身，所以真係食到底！難怪啲人都稱佢大件夾抵食。飯比較鬆散，好似屋企嘅白飯，而且暖暖地，令紫菜腍得較快，所以食到底部冇乜飯嘅位置先脆番少少。整體黎講，呢條手卷都係正常水平，冇話特別正，所謂四片魚腩都其實係切成條狀，唯獨抵讚係食到底都有料。比較驚訝係我留意到佢地嘅營業時間居然係3pm - 5am~夜一夜都有得食。