泰國市場餐廳

營業中

休息中

呢間小店冇靚裝修，地方淺窄，吸引之處在於由泰國人經營。對泰國人主理的食肆有信心，過嚟叫咗三個菜試吓。青木瓜沙律夠清涼，辣度有得揀，食得辣的，建議由中辣起跳，個汁甜酸度適中，非常惹味，勁鍾意青檸的清新香味。乾炒海鮮河有鑊氣，碟底冇一氹油，河粉入口煙韌，略嫌海鮮配料少咗啲，但不失為一碟好炒河。軟殼蟹配黃咖喱蛋汁喺小店名物，炸醬薄身脆口，隻蟹唔係得個殼，有肉地喎；黃咖喱汁零辣度，怕辣族唔使擔心得個睇字；汁內有蔬菜，冇加香草，屬低濃味食物，最啱撈白飯食。埋尾的泰式奶茶，嗰朕飄出嚟的泰茶獨特香氣，呃唔到人，入口餘香強勁，好茶！舖頭只得廚師同店員兩個人，百忙之中堅持好好招呼，禮貌周周。作為食客，無論落單、等上菜、埋單，咩都要有等待的心理準備喔。食客多數係街坊，同店員有講有笑，呢種氣氛真係小店至有。