鳳凰茶苑 (已結業)

星期日係繁華既市中心中，突然想搵一個寧靜既地方坐底放鬆一下，之後比我地搵到呢個茶莊可以坐底過一個舒適既下午。作為一個少品茶既朋友，黎到呢個地方，見到環境清雅，同時有整齊既地方可以泡一杯茶，即時將平時既忙碌同煩惱放低。由於係初次體驗，叫左二人套餐，對於未接觸茶藝同唔識選擇既朋友係一個不錯既套餐，包含左密雲龍大紅袍同埋玫瑰或者菊花既選擇，我地揀左菊花，感覺溫和啲。店員好細心教我地基本既沖茶技巧，幫我地開茶之後就可以自己慢慢沖泡同品嚐，見到佢有螢光幕播緊簡單既沖茶同焗茶等技巧，講真令我地都有好奇心想學習一下。講返個茶，大紅袍係多次沖泡中會有不停既茶味變化，令人好有衝動一直沖泡落去睇下有冇唔同既體會，之後我地試過加入菊花（外行人係會DIY一下）發現頭兩泡有好大菊花味，但之後會慢慢有味道既融合。整體黎講，係呢到可以過到一個休閒既下午同時又可以學習一下沖茶同飲茶既樂趣。店員會細心協助，最後同唔完既茶點同茶花都會幫忙打包，非常推薦想忙裏偷閒既你。最後比想學習既朋友一啲資料，呢到有茶藝班由體驗班到2-4堂既課程都有得選擇，聽講黎緊1月20號仲有音樂茶會，我認為都不失一個好既休閒節目。