一起果醬 (已結業)

夜晚黎到佐敦，我地選擇去一個較少人的餐廳，可以靜靜地傾下計。依度環境簡約，牆上有一個大大的JAM字，似乎係話俾大家知餐廳的主要特色。我和友人叫左幾款小食同一個主食黎share。食物都好快就送上。先黎芝士條。芝士條一定要襯熱食，咁先會有牽絲的效果。每款小食都有附上用手工果醬調製嘅醬汁，芝士條點少少醬汁，不錯！食到果醬嘅香同甜，如果果醬味再突出少少會更好。魚手指就係名符其實嘅魚手指。沒有驚喜。玫瑰蘋果雞翼有玫瑰嘅香氣，味道幾好。而且係單邊雞翼，食起上黎唔會太麻煩。每一款小食都配有醒胃沙律，用上柚子醋做醬汁，我個人覺得不錯！軟殼蟹意粉上有半隻軟殼蟹，對於軟殼蟹愛好者黎講可能會少左dd，不過意粉入面都有加入蟹肉，所以都算係幾蟹架。意粉有好香嘅蒜味，只係略嫌蒜味重左少少，遮蓋左其他配料嘅味道。最後，到甜品喇！九宮格士司有9款不同口味嘅果醬，全部都係手工架，由於係萬聖節期間，麵包係黑炭麵包黎架。果醬味道都幾特別，有d係意想不到嘅味道，例如木瓜，薑等等。各有特色，我個人就比較喜歡蘋果同菠蘿既。由於有多種口味，我建議可以俾客人知道各果醬係咩口味，等客人食完之後，想買果醬返屋企都知買咩口味呀嘛！