Backyard (已結業)

荃灣的8咪半開左幾間餐廳，其中見呢間人流唔多，可以悠閒嘆個晚餐，本以為冇咩人會中伏，但原來質素幾好，服務同食物都不錯。主菜選擇有齊雞、豬、牛、羊、魚。價錢$128-258。 沒有套餐，飲品及甜品都要另外點餐，價錢偏貴。先送來餐包有三款，最喜歡一片片款項的麵包，有蕃茄乾同好重香草味，質感鬆軟，外皮帶點似法包的硬。另一個包應該係黑芝麻包，味道唔突出。餅干條頗硬而脆身。美式咖啡$3x，味道幾香濃，加奶更滑，味道不錯。用粉藍色杯好靚，賣相提升。Iced latte $4x，用高身杯，份量好似偏少，甜度不高。雖然冰塊多，幸好味道沒變淡，也不錯。燴牛仔膝配松露汁 $198，牛仔膝煮得軟淋香滑，牛味濃郁，有如牛腩似的，好味。最吸引有骨髓食，用小匙來食，骨髓滑溜有點膩，有點似脂肪。但食唔出是松露汁。烤豬鞍配砵酒汁 $188，份量好多，有兩條骨，切開好厚身且啖啖肉。由於豬鞍要煮至全熟，所以一向偏乾硬，而且比較鞋。但旁邊有部份肉有彈性好有咬感，質感好好。但中間部份都係鞋，加上醬汁太少，更加乾身。配菜反而做得幾好，蕃茄及露筍都嫩淋好味，而且仲有炸蕃薯取代平時的炸薯條。