Chalet (已結業)

最近喺荃灣報咗興趣班，星期六上完堂就決定喺度食埋夜晚個餐。加上為咗慶祝紀念日，所以搵咗間高級少少嘅西餐廳試下。可能係夜晚食得早嘅關係，餐廳唔算好多人，安排左我哋坐近窗邊嘅位，環境幾清幽寫意。-半打生蠔伴隨生蠔嘅有三款醬料，雖然肉質唔算特別肥美，但生蠔味道幾新鮮，海水味較濃郁。-龍蝦湯湯底比較稠身，龍蝦味道十分厚重，鹹香十足。由於唔太肚餓嘅關係，所以只係嗌左一個Dinner set。包括是日餐湯、頭盤、主菜同是日甜品。是日餐湯類似平時飲到嘅忌廉湯，質感唔會太稀，但味道亦未至於好濃郁。-頭盤：半熟吞拿魚伴三文魚子吞拿魚半生不熟，口感特別。配上沙律醬及鮮味三文魚子，開胃非常。-主菜：美式燒烤醬豬肋骨配薯條，火箭菜沙律豬肋骨略嫌肉質過瘦，不過勝在有冶味燒烤醬搭救。薯條本身已有調味粉，單食都好香口。-是日甜品：麵包布甸同平時食到嘅麵包布甸都幾唔同，口感較實在，蛋香突出。另外仲叫多咗杯蘋果汁，不過味道唔算好特別所以就唔詳細評論啦。值得一讚嘅係店員嘅服務態度幾好，時刻留意住食客用餐情況。好迅速咁收碟同安排菜式，亦會詢問下客人餐後感。