緻 (已結業)

前幾日同朋友去左將軍澳食呢間日式串燒店。呢到嘅串燒有好多唔同嘅口味，例如月見、梅醬、中華藥膳、蒲燒醬等，唔似平時多數淨係得汁燒同鹽燒。雞皮$32煙燻海鹽口味，食落香脆。雞胸軟骨$44食落有少少肉又有軟骨，爽口。雞腿肉$48呢個係中華藥膳口味，藥膳同串燒呢個組合真係從來都未試過，但又幾唔錯喎。日本白豚五花腩$52呢個係柚子胡椒口味，食落五花腩肥瘦相間，配埋柚子嘅清新香氣就唔會覺得膩。茄子$68同平時食到嘅燒茄子唔同，呢到係味噌口味，鹹鹹甜甜嘅味道好惹味。日本獅子青椒仔$44一串有四件青椒仔，朋友好鍾意食青椒仔，呢個啱曬佢食。法國鵝肝配紫菜鍋巴$98鵝肝外脆內軟，油香四溢，配埋香脆嘅紫菜鍋巴，呢個配搭幾新鮮。松葉蟹冷蕎麥麵$78算幾抵食，因為松葉蟹肉都唔少。首先將雞蛋撈落蕎麥麵，然後再點冷麵汁食，好清涼好食。鰻魚炒飯$128炒飯唔算太乾身，感覺又啱啱好，鰻魚份量好多，仲要唔係細細粒嗰啲，咬落好有口感。