District 8 (藍塘傲) (已結業)

今日黎到將軍澳搵朋友，朋友帶左我黎呢間District 8食飯，呢度食午餐都夠晒舒服。午餐有前菜有主食，夠晒飽呀。前菜KING SALMON TARTARE(+$20)呢個係帝王三文魚他他，有啲似牛肉他他，加埋刁草，辣根，撈埋一齊整做一個大餅咁，食到三文魚嘅鮮甜，叼草嘅香，辣根嘅微辣，味道好有層次，口感都好豐富，再加埋香辣脆餅，脆脆地辣辣地，好好味。前菜ROAST BEEF AND POTATO SALAD依個前菜其實可以當主食禁食，因為都算大份，係烤牛肉薯仔沙律，唔會因為係沙律就好細份，牛肉都幾大嚿，而且好軟腍，薯仔整到好似薯片咁，一塊塊薄脆好惹味，再加埋雪梨酒汁同埋油封蕃茄，好豐富。主菜PASTA ALL’AMATRICIANA(+$15)呢個係蕃茄意大利麵，有煙燻豬面頰，豬面頰好腍好香，煎晒啲油香出黎，加上自家製蕃茄醬汁，成個意粉都食到香濃既蕃茄味，又有羅勒，好鮮好香。主菜BRAISED PORK BELLY(+$30)呢個係燉豬腩肉，豬手小丸子，芹菜頭，蘋果迷迭香醬汁，豬腩肉因為係燉嘅所以更加林身，啲豬手丸子係炸嘅，好香脆，芹菜頭都好特別，加埋蘋果迷迭香醬汁，甜甜酸酸好好食。