更多
2024-07-18
2460 瀏覽
依家參加婚宴都唔一定晌夜晚去飲酒,都多咗好多晌中午舉行,舊年就去過「迪士尼」參加婚宴, 中式嘅,今次就嚟到將軍澳「九龍東皇冠假日酒店」,不過,就食西餐,地點晌為位處47樓頂樓嘅「星幕」。始終餐廳位處頂層,望出去睇到將軍澳大部分景觀,更有少少海景,非常開揚,而餐廳裝修優雅,樓底高,加上今日包場,賓客大概60、70人左右,所以,坐得比較寬敞舒適。其實外面仲有個露天平台,平時就擺啲高腳枱櫈俾人客飲下嘢,吹吓風,睇唔睇到星就唔知,但今日就佈置成證婚場地,但呢個部分就唔方便影相俾大家睇喇。早兩年就因為staycation試過酒店樓下嘅自助早餐同午餐,感覺幾唔錯,唔知星幕嘅質素喺點?晌門口有啲單張攞,佢主打喺半自助午餐同晚餐,以及英式下午茶套餐,不過,今次婚宴嘅安排就簡簡單單,4道菜嘅西式套餐。題外話,主菜有3款,主人家事前就已經問晒賓客揀邊款主菜,小弟揀食牛,仲會問埋要幾成熟,所以,枱上嘅名牌右上角就有隻牛仔標誌。餐廳對主人家有咁嘅要求,相信事先安排好以便出菜嘅運作。如果賓客多嘅,逐個逐個問,真喺有排都搞唔完,所以,我覺得呢個安排都算幾好,但有一點我都好奇,就喺如果個客臨時想改變主意,唔知得唔得
呢個頭盤好搞笑,同枱有朋友以為就咁俾個牛油果出嚟,其實喺刮空個牛油果打成蓉,再釀返落去,不過,表面就加咗黑魚籽、刁草同埋食用花做裝飾,再冰鎮住,賣相非常別緻,睇見都涼快。一羹刮到底,下面就喺新鮮嘅吞拿魚刺身,再用啲柚子汁調味過,所以,食落清爽、清香,牛油果蓉口感非常之柔滑,雖然話配咗山葵沙律醬,但個人嚟講,就唔喺話太食得出。
餐湯最緊要夠熱,凍咗就唔好飲,呢一點眼前嘅野菌湯就交足功課,而且,菌味非常之濃郁,更有陣陣黑松露香氣,而口感非常之順滑,配上小麥餐包,喺非常之好嘅配搭。
件肉眼扒都幾大件,而且,燒得幾靚仔,有啲炭火坑紋,賣相吸引。一早已經揀定五成熟,落刀都覺得肉質都好軟腍,切開睇睇,色澤粉嫩,燒得啱啱好,唔會有血水滲出,食落好有肉香,又充滿肉汁,沾上少少芥辣,令肉味更突出。雖然話伴香辣薯條,其實,只喺普通炸薯條,無乜香辣味道,但另外除咗本菇,就仲伴有啲車厘茄、蘆筍仔,算喺一道幾豐富嘅主菜。
隨著上甜品嘅時間,仲會送上咖啡或茶。單講賣相就肯定喺普通咗啲,因為只喺一件千層酥加球雪糕,無乜再有啲特別裝飾。而件千層酥本身就幾好食,除咗酥脆之外,好有牛油香,又加咗唔少富蛋香嘅吉士,芒果亦都好清甜,至於球雪糕香兼好重奶味。
張貼