九記牛什粉麵

營業中

休息中

鵝頸橋街巿熟食中心係食晏聖地，清真咖喱、齋菜、碟頭飯同車仔麵任君選擇。諗住兩點半過後先上去九記避開人潮，行到樓梯頂推開度門，竟然都見到條 U turn 人龍，急急腳越過廿幾人走去龍尾。今日可以叫兩碗麵，度好晒叫 6 個唔同嘅餸，結果係好想食嘅齋同牛膀已沽清，只可以重温老友豬皮、豬大腸、煎魚餅同鯪魚球嘅味道。揀唔放湯食撈麵，必定要加炸蒜粒同辣椒油，將碗麵提香之餘，入口更加惹味。蒜粒同辣椒油大放任添，店主非常慷慨。人氣最強煎魚餅好味如昔，香脆兼彈牙；豬大腸洗得乾淨，零異味；豬皮夠入味，唔見有豬毛；鯪魚球冇煎魚餅咁香口討好，怕熱氣首選。加 7 蚊叫杯熱奶茶少奶。茶勁熱，夠香濃，細味會飲到多種茶香，真心覺得呢 7 蚊係超值。 一路食，條買麵人龍長時間都喺度。店員做到冇停手，難得佢哋冇黑面，仲會同生客講笑，樓面專員動作勤快，一眼關七，佩服之餘暗暗給讚。