K Square 4 Restaurant and Bar (已結業)

是日收工到旺角尋找美食，行咗陣朋友就話去食飯，喺朗豪坊附近就隨便search 下有咩食啦！最緊要唔洗行太遠！於是搵咗呢間酒吧餐廳！呢間餐廳情調不錯，冇一般酒吧嘅煙酒味，反而乾淨企理，座得舒服！睇睇menu ... 有二人晚餐，選擇都有幾多，就唔好煩啦叫個二人晚餐，同朋友一人揀一個主菜就搞掂，哈哈 唔洗諗咁多！頭盤有幾款，想食d特別d嘅，所以揀左三文魚他他千層！賣相不錯，煙三文魚混合洋蔥加上他他醬，好fresh , 底層配上多士，口感十足令人開胃！主菜揀左火焰鐵板烤雞同墨魚汁海鮮意大利飯！先講下火焰鐵板烤雞，嘩。。。真係好有睇頭，堅有火焰！燒到有一陣陣香味！ 正當研究點切時，店員主動問需唔需要幫手切，哈哈 咁我地當然求之不得！隻雞燒到好有肉汁唔會好乾身，皮脆肉嫩，不錯！而墨魚汁海鮮飯份量大，差點食唔唒，本人好怕青口腥，但呢個海鮮飯嘅海鮮煮得唔錯，一啲都唔腥，應該係海鮮頗為新鮮！最後，要食埋甜品先夠圓滿，所以加多$38 食鐵板冰火朱古力軟餅！其實真係幾有趣，鐵板好熱而且佈滿朱古力醬，朱古力蛋糕上有雪糕，食落去先冰後火，有啲似食緊心太軟，女人真係離不開甜品！好滿足！