青森料理 (已搬遷) 新店位置

是日一早便陪同事到青松觀求籤(其實不過是中午12點)，求完籤問完該問的事，就要找個地方食個懶洋洋既Lunch。於是我地去到近屯門市中心既德政圍，果度有好幾間餐廳，價錢平而且質素唔差架。兩個人一坐低就點左兩個set lunch share，一個日式燒汁雞扒飯，一個雜錦壽司。首先黎左前菜同飲品，包括蟹籽沙律、中華沙律，同杞子菊花蜜。兩個沙律都中規中矩，而杞子菊花蜜就好正喇，非常清甜，d杞子仲大大粒咁，唔飲得都睇得。日式燒汁雞扒飯，主食雞扒夠味又唔會鞋口，個汁好食但略嫌太少，本來想話加汁架，不過到最後因為食唔晒d飯，所以唔加汁都冇咩所謂啦。雜錦壽司，有三文魚、帶子、甜蝦、三文魚子、吞拿魚反卷，名符其實係雜錦，而且都ok既，另有一海膽手卷，呢個就唔係咁得，因為海膽太 'lim'。最後，佢地唔記得上個三文魚刺身俾我地，諗住叫'埋單'前，好在小妹心水清，即刻睇下個餐牌，呢個刺身失而復得，因此雖然唔係特別肥美，但係就寧舍鮮甜美味。