葵 (已結業)

話說講想食拉麵都講左好耐，今日黎到尖沙咀決定搵一間拉麵店食！我同朋友行行下見到一間鮮艷搶眼既黃色小店，睇下門口餐牌，原來係食拉麵既！再望下入面環境唔錯，簡潔乾淨，就決定入去再慢慢揀。餐牌上面既食物選擇唔多，不過岩哂我呢啲有選擇困難症既人。最後我揀左柚子雞白湯拉麵，而我朋友就叫左辣味噌拉麵，仲加多左個餃子小食試下。呢個係柚子雞白湯拉麵。有一堆柚子俾我地自己撈，食落仲好有柚子味，好清新，唔會覺得好＂漏＂。啲配料與眾不同，肉好厚，隻蛋成粒過，放入口漏啲蛋漿出黎好滿足！仲有粟米係一排過架！呢個辣味噌拉麵既湯底岩岩好，唔太辣，我朋友真係忍唔住飲哂成碗湯佢！呢個餃子入面有啲類似軟骨既餡，食落好爽口。由於我朋友比較大食，就決定叫多碗黑蒜油拉麵試試，啲蒜真係好足料好濃味，鐘意重口味既朋友可以試下呢個！不過係期間限定，有興趣可以快啲去試下先。