第一腸粉專賣店

營業中

休息中

呢間腸粉絕對係好野，耐唔時想食腸粉都會搭車去太子解饞。睇舖頭名都知佢專賣腸粉，不過佢仲有其他小吃、粥同飯賣。兩個人去，例牌兩碟腸粉，加個蘿蔔糕、菜乾豬骨粥同埋豆漿。我最愛叉燒腸，腸粉皮算薄，好滑，好多叉燒，加埋佢製過嘅鼓油，我一個人輕鬆清到一碟。個蒸蘿蔔糕又係另一重點，我本身唔食蒸嘅蘿蔔糕，家人叫過一次我食左啖之後發現係寶。佢其實唔多料，只係得蘿蔔同少少蝦米，但佢嘅蘿蔔係原條切條，好有口感，而且唔會成口粉好似好實嘅質地。另外個菜乾豬骨粥加鴨腎碎喺面，好有咸香，仲有舊咸豬骨，一邊食一邊自覺好下火。呢碟牛肉腸，睇到皮好薄好多料，家人鍾意，我自己麻麻，因為有芫茜。埋單$101，又飽又好食，簡簡單單又一餐。