Chalet (已結業)

見呢間餐廳正評頗多，即管就黎試一試呢度嘅晚餐。呢個餐廳裝修好特別，一入去到就好似置身瑞士嘅小木屋中。餐廳燈光偏暗，好有情調，雖然有提供酒精飲品，但唔會好似一般酒吧咁嘈吵。叫了2個dinner set。前菜係帝王蟹餅配蛋黃芥末醬或者忌廉芝士茄子卷，我地揀左每樣一款。是日餐湯係南瓜湯或者蘑菇湯，我地揀左蘑菇湯，主菜我地揀左法式紙包鱸魚和黑松露牛肝菌意大利飯。前菜先上，擺盤好靚，手機先食後，我地就動手。蟹餅好脆，一絲絲蟹肉又唔會太乾，略嫌有少少腥味，始終係海鮮，腥味在所難免。芝士茄子卷味道好特別，只係份量少了點，蟹餅抵食D。蘑菇湯聞落去非常香，味道非常濃，好重菇味，非常好味！讚！配以熱辣辣脆面包，相得益彰。牛肝菌飯上的泡沬好特別，但其實係無乜味道。整個飯菇味好濃，尤其係牛肝菌，配以黑松露，大啡菇，味道非常濃郁，簡直令我呢個愛菇之人愛不釋手。另一個係紙包鱸魚。打開紙包後，見到鱸魚好大條，而且係魚柳，無骨，啱晒我呢D懶人。法式嘅做法係帶少少酸甜味，但魚肉本身無乜魚味，味道有點失望。甜品係哈蜜瓜布甸和面包布甸。哈蜜瓜布甸唔夠滑，面包布甸就幾好味。