十十四川料理 (已結業)

「十十四川料理」係一間位於元朗yoho mall嘅新派川菜館。餐廳裝修走小清新風格，運用咗大量綠色植物同金屬吊燈做裝飾，大大面嘅落地玻璃窗令到室內光線好充足，餐廳環境闊落，成個感覺都幾chill！餐廳主打川菜，款式多樣，都有幾多意想不到嘅創意料理。🧡招牌酸菜魚（$168）試過唔少香港嘅酸菜魚，呢一間個辣做得好出色，連唔係太好酸菜魚嘅男朋友都一試就愛上！酸菜魚食落唔會覺得好辣好刺激，反而好香口！魚本身嘅鮮味都好出，完全無俾個辣蓋過！配菜方面就有酸菜、芽菜同薯粉。🧡回鍋肉炒麵（$78）回鍋肉炒麵我哋返兜試咗兩次，兩次嘅水準都一樣好。炒麵個辣同酸菜魚一樣都係香而不辣，食落好香口好惹味，同埋都好開胃，令人情不自禁會一啖接一啖食，真係辣得好過癮！🧡十十泡椒芝心豬肉丸子（$78）十十泡椒芝心豬肉丸子呢個配搭都幾新潮，味道複雜同有層次，一入口會食到外面一層酸酸甜甜嘅柚子醬，中間係豬肉加泡椒碎，咬開之後係好淡好淡嘅芝士味，最後會有一個回辣嘅尾調。唔會話好驚為天人，但都幾過癮，一試無妨！🧡士多啤梨冰粉（$38）士多啤梨冰粉個味道就唔係話特別好食，但特別解辣！食完辣之後再歎返個冰粉做埋尾，完美！