新南苑雞煲小菜點心 (已結業)

好耐無同媽媽兩個拍拖食飯，原本想落去黃大仙北館搵嘢食，途經竹園商場發現有新餐廳，望下個餐牌又覺得幾吸到，於是就入去試吓。餐牌都有好多種類，小菜、雞煲、西餐扒類甚至點心都有，啱哂我呢啲鍾意多元化嘅嘢食可以咩都試吓。今次就選擇咗小菜為主，點咗個蝦醬通菜炒鮮魷、薑蔥生蠔煲、三色蒸水蛋同埋一個例湯。燉湯係粉葛赤小豆雞腳湯，一飲就覺得好足料嘅味道。蝦醬通菜炒鮮魷嘅魷魚好爽口，蝦醬味好香。薑蔥生蠔煲有8隻蠔，Size都唔算細隻，薑蔥味好濃。三色蒸水蛋可以話係我人生中第一次食到咁多咸蛋黃！總括呢一餐係好味之餘，職員嘅服務態度都好好。