石記餐廳 (已結業)

尋晚放工同兩個朋友行經附近，好肚餓就入左去食野，諗住來係咁易食碗麵，但點知一坐低朋友們想食小菜，就唯有跟大隊。叫左涼瓜煎蛋角、節瓜炆排骨同蔥爆牛肉，另外再叫了油菜及白灼鯪魚球。例湯淡淡的，明顯是溝左唔少水，不過附送的期望都不大；幾味小菜都不太及格，涼瓜蛋角的涼瓜相當硬身，跟軟熟的蛋角南轅北轍，如果可以先飛水再煎蛋角會好好多，唔知係廚房偷懶定係特登整成咁，個人而言不太喜歡；我已經食得鹹，但都覺得個節瓜炆排骨好鹹，節瓜唔腍，呢個就應該係炆煮的時間唔夠，不過已經係煮得最耐的一味菜；蔥爆牛肉味道不俗，但蔥少牛肉多，多點蔥段更佳，而碟菜又「浸」在小半碟油中，未食到一半已經塊塊牛肉都油淋淋；菜的質數極差，完全唔掂；白灼鯪魚球竟然跟醬油，叫佢再拿蜆芥來，見廚房搞了一輛至拿來一碗，這個蜆芥是少見的難吃，酒味非常重又鹹，嚐了一口都無再吃，終於知道佢不給蜆芥的原因。如果食鯪魚球主要是吃蜆芥的﹝至少我係﹞，呢度的可以不吃。埋單都要一百七十幾，唔係平又不夠水準，以後來呢度還是吃牛筋撈好了。