露面手工拌麵料理

叫到成枱野食，上到枱先知樣樣都好大份，好足料！而且整體食物都有質素，性價比高。巴蜀粒粒大雲呑 $35 以為類似紅油抄手咁，原來只係無浸湯既雲呑加辣椒油。粒雲呑真係夠大粒，好足料，好食！加埋秘製辣椒油好香好惹味！（唔夠可以自己再加）現場見到有同店員包緊水餃，望落都好大隻。芥香麻醬雞絲粉皮 $42 粉皮彈牙，麻醬比較杰身，撈埋雞絲青瓜絲同芝麻，多重口感，正！溫馨提示，因為太多料，所以要小心啲撈，唔係就跌晒徙左拉。野生松茸鮮雞湯 $38 雖然賣相同餐牌上有點差異，但松茸片幾多，仲有件煲到入口溶化既雞，飲落好鮮甜。油撥辣子魯肉Biang Biang麵 $55 餐廳主打手工麵，呢個Biang Biang有點似刀削麵，麵條粗身有嚼勁，夠掛汁。個魯肉係半肥瘦，夠入味，仲有冬菇粒，兩者size差不多，食起來口感豐富，味道唔錯，我再加埋秘製辣油撈埋食仲正！啖啖魚肉酸菜魚 $68 呢個麵餐好抵食，仲跟埋杯菠蘿青檸蜜。不過我見另一個叫左Biang Biang麵，呢個就加$3轉波菜寬麵。酸菜魚上枱果陣都覺得好大碗，但原來碗麵係另上！真係好足料！魚片好多，雖然唔算好嫩，但都可以接受。另外仲有蘿蔔條，大豆芽等等。