正宗上海生煎皇 (已結業)

今日朋友話去食明星餐館，話係食小籠包好出名嘅。去到餐廳，舖頭有啲狹窄，完全係隱世小店feel，於是我抱住期望入去食。佢係用剔剔紙俾你自己剔，見到啲價錢都係三十蚊左右，感覺唔貴，就叫返幾味咁啦。當然小籠包是必須點的，話晒人地招牌，一試便知龍與鳳啦。個皮又唔會好厚，但又唔係真係好薄好驚喜。佢個湯汁比較清，唔會好似有啲小籠包咁甜到好唔自然。呢個價錢算係抵食。生煎包係我朋友今次嚟嘅目的，因為我好怕油，所以冇試，但睇朋友食佢一咬就爆汁，好利害咁😂雖然賣相唔吸引，但佢話幾好食。嗌左個九菜水餃，普普通通，冇九菜味都有豬肉嘅鮮甜味，冇話特別好食或唔好食，可以填下肚咁。海折青瓜，海折淡如水，冇味。因為個汁都好淡，所以青瓜都係青瓜味，冇汁可言。肴肉幾好食，味道岩岩好，唔會太咸，呢個唔錯。川麻雞翼，我又係忘記左影相，所以其實佢係一碟四隻。佢個樣似土匪雞翼，但係味道都係偏淡，小小小小小丁咁點嘅麻，唔辣，都係冇乜特別。兩個人食，呢個價錢中規中矩啦，因為佢碟碟都細細碟，份量唔多。只要唔係餓左兩餐先去食都ok嘅。