華輝小食 (已搬遷) 新店位置

華輝小食星期六約咗幾個老友去大圍踩單車，起程之前，梗係要醫飽個肚先啦。 我地見華輝小食近近地，就幫襯下啦。係大圍住既朋友應該都知道呢間小食店主打係麻辣手撕雞，配搭撈麵，飯或者腸粉。由於同行大部分係唔食辣既女仔，咁我地就叫咗一個手撕雞撈麵同腸粉。餐廳衞生情況一般，店員唔會主動去抹枱，而食完既食物同餐具都係靠客人自動自覺拎出去扔。落單冇耐就有得食！ 估唔到呢間小店都幾足料，手撕雞同撈麵既份量係一比一。撈麵質地偏硬，如果唔鐘意太硬既朋友可能要係落單既時段講清楚。調味就正常營多撈既味，不過不失。而腸粉方面，份量都好足夠，腸粉口感滑溜，唔會太厚身，可惜一夾就散開，有少少扣分。食腸粉當然唔少得甜醬麻醬，麻醬香味尤其突出，應該仲落咗少少麻油，加埋芝麻，好香好好食。最後梗係要講主角手撕雞，雞肉都好嫩滑，而且有啲連皮既雞肉，食落有少少油脂，香味更濃郁。但調味方面有少少重手，BB辣都有少少刺激，而且食到最後雞肉會溝埋腸粉既鼓油同麻醬，所以都好膩，建議雞肉同主食可以分開放。