華記小食

營業中

休息中

講起街頭小食，本蟲真係覺得自己嘅價值觀有啲同時代脫節，唔係好耐之前依啲嘢食都仲係幾講緊幾蚊串，有啲區仲有兩三蚊串賣。自從食環署全力打擊流動食肆，逼使佢哋入晒鋪頭之後，香港嘅民間小食就開始出現一啲質變。首先臭豆腐總係好似冇舊時啲咁有口感，臭味亦越嚟越少。另一方面，價錢就直線上升，我好難先開始說服到自己五蚊串係市價，但今年全世界都因為通脹而瘋狂加價，再咁落去依個價格都行將衝破個位。嗰日喺尖沙咀等朋友一齊食飯，一時口痕經過依度就篤兩串嘢食下，魚蛋夠彈牙，個汁都好惹味，之後又整串炸大腸同燒賣，三兩下就洗晒身上嘅散紙，好彩朋友適時出現，如果唔係就算我未食窮都睇怕已經食飽。