茶屋町 (長沙灣道) (已結業)

近排無咩食神福份, 經常幫襯D唔多掂檔嘅餐廳.連一D幫襯過唔錯嘅餐廳, 都轉為差劣, 發生咩事?今日同女友食咗個早餐, 之後忙到中午飯都無時間開, 所以出深水埗一落巴士, 女朋友已經話肚餓要食飯!大家都知, 女友發火, 非同少可! 即刻食飯!見到茶屋町, 係門口望望個餐牌都算啱咀形, 即刻沖入去.汁燒鰻魚丼同咖哩和牛漢堡係自己心水, 另外女友想食明太子雞翼同炸薯餅....好好好, 叫叫叫.....怕咗佢!餐廳雖然店舖細細, 但出品又唔錯喎.....初時以為鰻魚飯好細碗, 食落先發現個碗中間係凹陷, 成碗飯份量充足, 而且好明顯用上日本珍珠米, 再加上味道帶甜嘅燒汁, 滿意!鰻魚原條上夠哂台型! 鰻魚入口即溶, 好味到女朋友掛住食都唔理我!牛肉漢堡係另一個讚, 入口無渣無根, 好似食緊蒸牛肉餅, 唔需要點咖哩汁已經好好味, 日本咖哩汁一直唔辣同樣味道帶甜, 再配埋粒粒分明嘅珍珠米, 滿意x2.明太子雞翼同炸薯餅同樣超熱辣咀, 食果時要留心. 雞明太子份量不少, 炸著餅外脆內軟而且內餡加上奶油, 更加嫩滑!原本想話食雪糕，滿腹食唔落，可惜！哩餐女朋友話好滿意！我話知道啦！食到褶褶聲唔理我！