Comma Cafe

營業中

休息中

上次嚟過呢一棟大廈之後，發現原來呢度有好多間樓上Cafe，所以今次就嚟到另一間試吓。打開𨋢門就見到呢度有佈置得好靚嘅花牆，仲有大大個胡桃夾子俾人用嚟打卡，少女心爆棚。除咗有花牆，每張枱都用花花來做佈置，餐具亦用左西式宮廷風，又係用嚟打卡一流。嘢食方面一頁可以睇晒，我就叫咗一個森林迷宮，加是日甜品，仲有藍莓乳酸。森林迷宮就係一個香草什菌白汁燴飯，意大利飯粒粒分明，吸收晒啲白汁，雜菌亦都切得又大件又細細粒，口感多層次，加埋面頭嘅香草做點綴。藍莓乳酸就用咗新鮮嘅藍莓嚟打成， 非常新鮮。至於是日甜品就係蜂蜜厚多士。厚多士分量十足，真係有成吋咁厚，麵包皮焗得夠脆，面頭仲搽咗一層蜜糖，所以食落甜甜地，加上隔離有自家配製嘅蘋果蓉果醬，有蘋果粒，搽埋出去舊多士度一齊食，口感十足，推介呢個甜品。呢度落單同埋煮嘢食都係得一個店員負責，真係辛苦晒。