鮨丼 (已結業)

今日同朋友嚟到尖沙咀呢間海鮮丼飯專門店 - 鮨丼。自從喺日本食過爽口彈牙, 又油香四溢嘅左口魚裙邊, 一試愛上。左口魚裙邊成為咗我食魚生必點嘅一味, 今次當然都唔例外啦。呢度幾款海鮮丼都有左口魚邊, 我同朋友齊齊揀咗左口魚邊拼三文魚丼飯。海鮮丼附有麵豉湯、沙律、漬物。左口魚裙邊, 係整條魚最肥美的部位, 呢度嘅左口魚肉質雖然非爽口彈牙, 但口感柔軟細膩, 油脂甘香豐盈, 入口即溶, 經火灼後魚油溶化, 完全滲透至每顆飯粒, 魚油撈飯, 夠曬矜貴。厚切三文魚, 脂肪紋理自然, 肉身順滑豐腴。值得一提, 平時食海鮮丼一般都附上檸檬, 而呢度則用上青檸, 比一般檸檬嘅酸味, 青檸味道更清新怡人, 喚醒味蕾。甜品椰絲糯米糍, 外層煙煙靭靭, 可惜入面係慕絲, 而唔係我期待嘅雪糕。