Gusto - Taste Italian (已結業)

平日去尖東，一出閘就見到一間紅色嘅意大利餐廳，今日終於有機會試下。餐廳佈置好溫馨，擺埋聖誕樹好有聖誕氣氛，適合同家人聚會。叫咗杯Ice Volcano，一送到嚟嘅時候，飲品上面擺左熱情果殼，侍應會係殼上面點火，打卡一流～飲品有菠蘿味，味道好fresh，同時甜甜地酒味唔會太濃，好適合女仔飲。前菜我哋嗌咗意式蕃茄多士，多士烘到小小脆，上面有好多番茄同洋蔥，酸酸地夠開胃。中間亦有沙律，既清新又健康，亦好重橄欖油香。主菜我哋分別叫咗香煎比目魚同香烤乳豬卷。比目魚煎得好香，油份好重，令魚肉結實得來滑溜，同時魚皮好脆。香烤乳豬卷嘅豬皮好脆，豬皮同豬肉完美配合，每一啖又脆又軟稔。豬肉肉身唔乾，油脂分佈適中，如果覺得油膩仲可以點蘋果蓉中外一下。甜品三重朱古力脆脆蛋糕有三層唔同口感嘅朱古力，上面有厚厚嘅朱古力mousse，口感幼滑，中間層朱古力蛋糕夾雜着有少少朱古力脆，仲有藍莓同士多啤梨點綴。