漁道樂 (已結業)

之前放假同男朋友出去食好西，佢帶左我去試呢間高質日本野。刺身鮮甜又好味，環境仲要幾靚，坐得好舒服。❀象拔蚌刺身❀第一次食象拔蚌刺身，平時打邊爐就食得多，生食估唔到都幾好味，象拔蚌邊邊好似波浪咁卷起，口感鮮嫩爽脆&滑溜。❀唐揚池魚仔❀份量好多，覺得好岩送酒，炸到金黃香酥，一啖咬落口，連骨都食埋，唔怕會拮到，即使炸完肉質都咁嫩滑。❀生蠔、左口魚裙邊壽司❀生蠔大大隻又肥美，海水味唔太重；一啖食哂好邪惡🥰左口魚邊油脂特別豐富，入口滿口魚油香。❀牡蠣和牛❀以為係和牛壽司，點知個底係生蠔，兩者又幾夾，生蠔中和左和牛既油膩感，再encore食多幾舊都得💕❀明太子玉子燒❀有成8舊咁多，一人食4舊，明太子同玉子燒呢個經典組合，鹹香得黎又有少少甜，唔錯。❀牛油果雲丹天婦羅❀擺盤好似孔雀開屏咁好好睇，天婦羅炸漿好薄，食落脆卜卜，牛油果海膽天婦羅食落好creamy。❀士多啤梨、菠蘿乳酸❀食咁多野飲下酸酸甜甜既特飲，好大杯，解渴一流。