五要素食堂 (已結業)

呢排有套戲好旺場，為咗要買到靚位，今晚收工就過左去尖沙咀買定戲飛，再食返晚餐先返屋企！地點方便嘅The One有非常多餐廳，今晚就揀咗日式洋食 — Fifth Elements。餐廳算半開放式，感覺幾開揚，未入餐員工就已經好客氣地招呼，而估唔到嘅係，員工全部都係講英文，令我有置身係西餐廳嘅感覺🤣熟成厚切牛舌丼（$88）呢度用料幾用心，用咗日本產富山縣天盛米，粒粒珍珠米食落好香，落咗少少醬同紫菜增加風味，牛舌煎到外面好香，入面肉質好軟嫩又juicy，加埋炸蒜片一齊食真係幾正！另外，加$18可以加配定食，有濃厚男爵薯仔沙律同日式洋蔥湯，個人好鍾意個薯仔沙律，有洋蔥、青瓜同薯仔，面頭芝士味超濃！蟹肉味醬薯條 （$68）非常特別嘅送酒佳餚，新鮮炸起嘅超香口薯條，蘸一蘸有唔少蟹肉嘅沙律醬，完全食到停唔到口！肉桂富士蘋果日式鍋夫 （$68 ）全部係自家製日式鍋夫，比起平時食嘅牛油味同蛋味冇咁濃，比較脆身，配埋好香嘅肉桂同酸酸甜甜嘅富士蘋果，係好好嘅飯後甜品。凍靜岡抹茶拿鐵（$42）奶味好香但抹茶味唔算太濃。下次黎要約多幾個朋友試吓佢嘅手工製作薄餅、創意料理同飲下酒！