Poseidon Restaurant & Bar (已結業)

早排同事話有間食海鮮嘅西餐廳想試，又喺尖沙咀，喺公司行過去都係大概15至20分鐘左右，所以就約咗日放工一齊去食。咁我哋坐底之後一共嗌咗五碟菜式，之後每一款嚟個簡介。首先嚟個前菜，我哋叫咗個「鱘魚黑魚子煙三文魚他他」，個他他好開胃，少少酸嘅醬汁加埋上面嘅他他，個他他頂再放多幾塊金箔，令佢望落好似再high class啲。直接介紹咗今晚嘅主角先，「烤龍蝦海鮮拼盤」，賣相係咪好吸引呢？海鮮種類多，而且每款都新鮮，絕對唔係雪藏貨。除咗隻龍蝦得半隻唔夠分，其他分量都足夠四個人分。有魚下一樣介紹係肉，我哋本來想叫個肉眼扒，但係最後改變主意，嗌咗碟「美國醬燒豬肋骨配薯條」。肋骨好腍好入味，不過我掛住食海鮮淨係食咗好少肋骨。下一碟係「傳統西西里鮮蟹肉扁意粉」，雖然賣相都係好正，但係相對上面幾碟個意粉比較普通，唔係話唔好食，個意粉都好味，只係個海鮮拼盤同他他實在太好食，如果拼盤同他他係9.5分，個意粉會係8分。然後因為口痕所以要咗個「芝士旋風薯條」，熱辣辣嘅薯條加埋啲芝士再點佢個黑松露蛋黃醬，好正。整體嚟講，食物水準都好高，食完好滿足，等政府取消晚市限制之後，我一定會帶朋友嚟呢度happy hour。