居酒屋·姫 (已結業)

今日同朋友過嚟尖沙咀食日本居酒屋，一入到去係好別緻嘅日本居酒屋裝修，坐咗一陣已經全間鋪坐滿✨估唔到食物高質價錢亦唔算太貴，喺尖沙咀想食高質居酒屋可以過嚟食。🐟嚴選季節特上六款刺身盛合 -我覺得最特別嘅係腦天，即係吞拿魚頭頂鼻骨個位，好重油脂香，輕輕咁樣燒過好香加埋豆苗包住食啱啱好平衡到。-池魚片加上梅子醬同埋紫蘇葉一齊食，好地道嘅日式味道。-平政好厚切，口感好好。-海膽一啲都唔腥，包埋脆脆嘅紫菜食啱啱好。🍶清酒煮蜆 好香清酒味同時間亦有少少蒜蓉味，啲蜆好新鮮仲有少少海水味。🍖紐西蘭羊鞍 燒得生熟度啱啱好，肉仲係好嫩，加埋芥末醬加少少黑椒鹽好惹味。🍗自家製月見免治雞 自家製嘅免治雞肉棒加上濃香蛋黃味嘅夢王蛋，係送酒嘅好伴侶。✨手挽塩白鰻燒 白鰻肉好厚juicy，皮燒得好香脆。🍚海膽三文魚籽釜飯 滿滿嘅海膽同埋三文魚籽，飯吸收咗佢哋嘅鮮味，仲有少少飯焦，飽咗都食到一大碗。