世華餐廳 (已結業)

朋友只喜歡食中菜，是日出左黎尖沙咀，上開飯搵下附近有咩好中餐館先，找到世華餐廳，睇相好似唔錯咁，就試下佢先。地點在K11的後面街，好易搵。上到去，坐了窗邊的卡座，幾濶落好坐。餐具簡潔，感覺還不錯。茗茶($10)開了壺普洱茶，茶夠濃又夠滾，好飲。睇睇餐牌，小菜好多款式，鐵板，煲仔咩都有，最後由朋友拍板點了幾款小炒。黑椒一口牛柳粒($58)先來小食的牛柳粒，豉椒炒，味道好濃列屬重口味的，牛柳粒嫩滑，正。鹽酥鮮魷魚($58)同樣是小食類的炸魷魚鬚，是不沾粉的炸法，很乾身一點都不油膩，略微淡了點，朋友跟我都是重口味人仕，加多一點點鹽就好了。豉汁涼瓜排骨煲($88)嘩，上枱時好大煙，個煲都燒熱左㗎，好香呀！排骨入味，涼瓜爽脆不苦澀，好好下飯～干鍋肥腸($88)仲有呢碟鐵板上的肥腸，塊板超熱要小心呀！肥腸夠肥彈牙有咬口，微辣好惹味，正！白飯($10)咁多好餸點少得白飯呀，撈汁一流。地方大好好坐立，食物好食，價錢也合理，想食中菜的好選擇呢。