九龍香格里拉大酒店大堂酒廊

營業中

休息中

香港地家陣經濟差，你知我知單眼佬都知。但到底市道疲弱成點? 九龍香格里拉既舉動大概已告知一二。每晚六點半至十一點半，酒店大堂賣中式糖水 (其實仲有兩款班戟)，價錢三十八個大洋起...最貴嗰款燉椰皇，都只係七十八蚊，簡直直迫深水埗松記，大癲...老媽子得知呢個消息，即刻搵埋阿妹一齊去食，佢萬歲！本來想吃$48既貓山王榴槤班戟，可惜售罄，唯有退而求其次，選來芒果班戟，仲平，$38有交易。漲卜卜的班戟，仲有食用花和金箔作點綴，加埋酒店既靚靚餐具，淨係打卡都抵。再講，班戟皮軟熟，餡料豐富香甜，唔係雪到了無生氣咁，絕對無揸流攤。老豆和阿妹都食湯丸，分別要左合桃露湯丸，與及芋圓薑汁湯丸。兩款都好大碗，前者夠香，後者感覺更足料，阿妹話嗰薑茶好夠辣。老媽子就要全場最貴既原個榔皇桃膠燉蛋白，製作需時。即製的成品自然熱呼呼，面頭仲有唔少桃膠，唯老媽子覺得可以再甜些少，畢竟我家成員都是帶著甜魔基因。我既西米布甸，熱度充足，栗蓉都香，硬要挑剔的話就係面頭未夠燶。咁既價錢，係五星級酒店大堂舒舒服服咁食糖水，無限時無人趕，甚至有現場音樂表演，真心有啲不可思議。到底，係好事定係壞事?!