扒王一哥 (已結業)

怕睇多字可跳至第二段，我好耐無寫食評，食前都無諗過寫，所以食物一到果吓無立即影相，但食過就忍唔住補影，過往有間食牛唔錯嘅，而家想揾就執咗，令我有想為保留一啲有誠意嘅餐盡一分力。呢度裝修算 ok, 起碼乾淨，我星期六成兩點先到，人唔多，環境唔嘈算舒適，伙記年紀較大，但招呼周到有禮貌，點咗個做緊特價嘅鐵板牛眼腱，本想叫七成熟，伙記提示怕唔怕太熟啊，醒起自己叫鐵板上可能會 over, 即刻講返六成，伴薯菜，熱啡多奶。薯條一上已有驚喜，係你唔想等就立即伸手攞果隻，果然香脆，加上亨氏茄汁係絶配。再上牛扒時伙記細心問，要唔要幫你倒汁，好! 再提示請用紙巾擋擋，有時去酒店幫襯個上菜侍應都無咁問過，呢個伙記真係值得打賞。件牛一落刀個吓已知係好食，個柔軟度啱啱好，真係要寫個食評做過『保肉人士』，唔係下次想翻單嘅機會就無。杯啡無加錢都預咗唔會有拉花，所以我無打卡，但勝在香濃適中，而且份量充足，抵飲！