尚鮮海鮮料理 (已結業)

而家呢個年代冬天越黎越短，難得上個月聖誕節之後凍左幾日，之後都係一直17-21度咁，都唔知今年仲會唔會再凍。所以趁又熱返之前，想打多幾次邊爐應下個冬天 (雖然而家夏天都係照咁打🤪)而家在銅鑼灣的樓上火鍋店都有唔少，同事就介紹左呢間尚鮮，佢話野食新鮮同埋靚不在話下，最重要係有好多二人卡位仲有獨立電視，講到咁浮誇，所以今日就同女友黎左試下晚飯。好彩一早book定枱同埋都早到，所以仲坐到有電視既卡位✌🏼雖然多數商廈入面既食肆都唔會話好大，但呢間攪位攪得好，每張枱都坐得舒舒服服。先叫左兩個小食，獅子狗魚旦本來我麻麻的，估唔到佢入面有啲芝士，又熱左融融地咁，令到個質感好好，唔似平時嗰啲咁乾身！另外就叫左openrice好多人推介既百花釀油條，果然香口得黎唔油，個蝦滑好香又彈牙，配個油炸鬼脆口，好食！我覺得點一點麻辣湯仲惹味，不過就咁食點佢既酸甜醬都好正😋湯底我地叫左鴛鴦湯底，血池麻辣同秘製傳統土鄉材料就叫左特尚手切牛(中)，燙數秒就食得，好嫩滑！同埋好有牛肉味！另外仲叫左盤海鮮尚盛(二人)，好新鮮，有廣島蠔，白鱔片，海蝦，大花甲同聖子皇。