太郎居酒屋

營業中

休息中

走入平時比較少去近中港城果邊既廣東道，見到呢間太朗居酒屋好似幾有feel就同個朋友入去試一試。店內既氣氛都充滿日系風，最特別同有印象既係滿佈日式海報既牆身，帶點復古風得黎又有特色。收工後黎到居酒屋當然要好似日本人咁飲返一杯酒又食下送酒小食先啦。今次試左款幾特別既叫芒椰奶西既香港手工啤，入口清爽帶一陣果香而且入口幼滑又帶濃密既汽泡感。配上炸日本蝦作為下酒菜先開一開胃，炸迷你蝦一口size，味道鹹香又香脆。再配上刺身盛合真係完美！一啖新鮮魚生再配一啖啤酒夠晒爽。盛合內有平時好少食既日本蠔-日之雪花蠔，原來日本蠔質素係咁高！好新鮮。北海道珍寶帶子彈牙又甘甜。深海池魚， 劍魚腩，油甘魚同樣帶出魚油香又鮮。特丹蝦甘甜彈牙好滿足。水母刺身係居酒屋真係第一次食！港式海蜇就食得多但原來日式都可以咁有特色。加上少少日式醋帶點酸香同樣係開胃下酒菜之選。同樣係居酒屋入面串燒一定唔少得！今次點左幾款串燒同朋友一邊食一邊傾下計。2款蔬菜類既翠肉瓜同雞脾菇都燒得剛好唔會過乾身。鹽燒雞軟骨香脆仲帶點軟骨既油脂香。其餘仲點左芥末松阪豬，孜然豬大腸同最愛既鹽燒雞翼試試！整體都好唔錯，燒得夠香口又唔會過焦。